હાલમાં, બોલિવૂડ અભિનેત્રી કંગના રનૌત, જેને પદ્મશ્રી પુરસ્કારથી સન્માનિત કરવામાં આવી હતી, તેણે 1947માં મળેલી આઝાદીને ભીખ કહ્યા બાદ વિવાદ શરૂ થયો છે. સોશિયલ મીડિયા બાદ હવે પાર્ટીના ઘણા નેતાઓએ એકસાથે કંગના રનૌતનો વિરોધ કરવાનું શરૂ કરી દીધું છે. તમામ નેતાઓએ રાષ્ટ્રપતિ અને સરકાર પાસે પદ્મશ્રી પુરસ્કાર પરત લેવાની માંગ કરી છે.

એક ચેનલને આપેલા ઈન્ટરવ્યુમાં કંગના રનૌતે કહ્યું હતું કે 1947માં મળેલી આઝાદી ભીખ હતી, અસલી આઝાદી 2014 પછી જ મળી, જ્યારે દેશની બાગડોર વડાપ્રધાન નરેન્દ્ર મોદીના હાથમાં આવી.

કંગના રનૌતના નિવેદનની દેશભરમાં નિંદા થઈ રહી છે. કોંગ્રેસના વરિષ્ઠ નેતા આનંદ શર્માએ નિવેદનને ચોંકાવનારું અને આક્રોશજનક ગણાવ્યું હતું. તેઓએ રાષ્ટ્રપતિ રામનાથ કોવિંદને તેમની (કંગના રનૌત) પદ્મશ્રી પરત લેવાની માંગ કરી છે.

આનંદ શર્માએ કહ્યું, “કંગના રનૌતનું નિવેદન એ મહાન હિંમતવાન સ્વતંત્રતા સેનાનીઓનું અપમાન છે જેમનું નેતૃત્વ મહાત્મા ગાંધી, નેહરુ અને સરદાર પટેલ હતા. એટલું જ નહીં, તેમનું નિવેદન સરદાર ભગત સિંહ, ચંદ્રશેખર આઝાદ અને અન્ય ઘણા ક્રાંતિકારીઓના બલિદાનને પણ ઓછું કરે છે.

તેમણે કહ્યું કે આવા પુરસ્કારો આપતા પહેલા પુરસ્કાર મેળવનારનું સાયકો-મેડિકલ મૂલ્યાંકન કરવું જોઈએ જેથી આવી વ્યક્તિઓ રાષ્ટ્ર અને તેના હીરોનો અનાદર ન કરે. બીજી તરફ હરિયાણાના પૂર્વ મુખ્યમંત્રી ભૂપિન્દર સિંહ હુડ્ડાએ કંગનાના નિવેદનને વાહિયાત ગણાવ્યું હતું.

જયારે, બિહારમાં NDA સાથે ગઠબંધન કરનાર હિન્દુસ્તાની અવમ મોરચાના પ્રમુખ જીતન રામ માંઝીએ કહ્યું કે તમામ ન્યૂઝ ચેનલોએ હવેથી કંગના રનૌતનો બહિષ્કાર કરવાનું શરૂ કરી દેવું જોઈએ.

માંઝીએ રાષ્ટ્રપતિને વિનંતી કરી હતી કે કંગના રનૌતને આપવામાં આવેલ પદ્મશ્રી તરત જ પાછો ખેંચી લેવામાં આવે. નહીં તો દુનિયા વિચારશે કે ગાંધી, નેહરુ, પટેલ, ભગતસિંહ, કલામ, મુખર્જી, સાવરકરે આઝાદીની ભીખ માંગી હતી.

શિવસેનાના નેતા નીલમ ગોરહેએ કહ્યું કે કંગના રનૌત પર ભારતની આઝાદીને ‘ભિક્ષા’ કહેવા બદલ રાજદ્રોહનો આરોપ લગાવવો જોઈએ. શિવસેનાના નેતાએ કહ્યું કે, રાજદ્રોહની સાથે તેમનો પદ્મ એવોર્ડ પણ રદ થવો જોઈએ. જયારે, આમ આદમી પાર્ટીએ મુંબઈ પોલીસને એક અરજી આપી છે અને કંગના રનૌત વિરુદ્ધ કેસ નોંધવાની માંગ કરી છે. AAPના રાષ્ટ્રીય કાર્યકારી સભ્ય પ્રીતિ શર્મા મેનને અભિનેત્રીની ટિપ્પણીને “દેશદ્રોહી અને ઉશ્કેરણીજનક” ગણાવી હતી.

એટલું જ નહીં, કંગના રનૌતના નિવેદન પર બીજેપી તરફથી પણ પ્રતિક્રિયા આવી છે. લોકસભાના સાંસદ વરુણ ગાંધીએ સોશિયલ મીડિયા પર કંગના રનૌતનો વીડિયો શેર કરીને પૂછ્યું કે, “શું મારે તેને ગાંડપણ કહેવું જોઈએ કે રાજદ્રોહ”.

વરુણ ગાંધીએ ટ્વિટ કર્યું હતું કે, “ક્યારેક મહાત્મા ગાંધીના બલિદાન અને તપસ્યાનું અપમાન, ક્યારેક તેમના (મહાત્મા ગાંધીના) હત્યારાનું સન્માન, અને હવે લાખો સ્વાતંત્ર્ય સેનાનીઓના બલિદાનનું અપમાન – શહીદ મંગલ પાંડેથી લઈને રાણી લક્ષ્મીબાઈ, ભગત સિંહ, ચંદ્રશેખર આઝાદ થી નેતાજી સુભાષ ચંદ્ર બોઝ સુધી. શું મારે તેને ગાંડપણ કે રાજદ્રોહ કહેવું જોઈએ?

Facebook Comments

Videos

Our Partners

Allianz Cloud