• ભરૂચ LCB એ મેટ્રો કુરિયરની ઓફિસમાં દરોડા પાડ્યો, કાર્ટુનો ખોલ્યા તો નીકળ્યો ₹1.64 લાખનો દારૂ
  • કાર, એક્ટિવા મળી કુરિયરના સંચાલક સહિત 2 ની ધરપકડ, બે વોન્ટેડ, ₹4.64 લાખનો મુદ્દામાલ જપ્ત

WatchGujarat. લો બોલો હવે કુરિયરની આડમાં દારૂનો ધંધો થતો હોવાનો પર્દાફાશ પોલીસે કર્યો છે. ભરૂચ LCB એ મેટ્રો કુરિયરની ઓફિસમાં દરોડા પાડ્યા હતા. સર્ચ કરતા પોલીસ પણ ચોંકી ઉઠી હતી. ટ્રિપલ બોક્ષમાં સંતાડી પાર્સલ સ્વરૂપે દારૂનો જથ્થો મળી આવ્યો હતો. કુરિયરની આડમાં વિદેશી દારૂનું વેચાણ કરતા કુરિયર સંચાલક સહિત 2 આરોપીને ક્રાઇમ બ્રાંચે ઝડપી ₹1.64 લાખનો દારૂનો જથ્થો જપ્ત કર્યો છે. જયારે 2 ને વોન્ટેડ જાહેર કર્યા હતા. એક કાર ,એક્ટિવા મળી કુલ ₹4.64 લાખનો મુદ્દામાલ કબ્જે કરાયો હતો.

ભરૂચ LCB ની ટીમ અંકલેશ્વર વિસ્તારમાં પેટ્રોલીંગમાં હતી. દરમિયાન જીઆઇડીસી વિસ્તારમાં દેસાઈ પેટ્રોલપંપ પાસે આવેલા મહાવીર કોમ્પ્લેક્સમાં મેટ્રો કુરિયરની ઓફિસમાં પાર્સલોની આડમાં ઇંગ્લિશ દારૂનું વેચાણ કરવામાં આવી રહ્યું હોવાની ચોક્કસ બાતમી મળી હતી. બાતમીના આધારે પોલીસ ત્રાટકી હતી.

ટ્રિપલ બોક્સમાં પેક કરેલા પાર્સલ બોક્સમાંથી દારૂનો વિપુલ જથ્થો મળી આવ્યો હતો. એલસીબી એ મૂળ રાજસ્થાનના અને હાલ જૂની કોલોનીમાં રહેતા ઓફિસના સંચાલક પારસગીરી લહેરગીરી ગોસ્વામી તેમજ દારૂનો જથ્થો લાવનાર મહેન્દ્રપુરી રૂપપૂરી ગોસ્વામીને ઝડપી પાડ્યા હતા. પોલીસના દરોડાને જોઈ સ્થળ પરથી સુરેશપુરી રાજપુરી ગોસ્વામી ફરાર થયો હતો. દારૂ મંગાવનાર જૂની કોલોનીમાં રહેતો ઉમેશ મહેશભાઈ વસાવાને વોન્ટેડ જાહેર કરાયો હતો.

ભરૂચ એલસીબી એ રૂપિયા 1.64 લાખનો દારૂ, એક સ્વીફ્ટ કાર અને એક્ટિવા મોપેડ મળી કુલ રૂપિયા 4.64 લાખનો મુદ્દામાલ જપ્ત કર્યો હતો. જીઆઇડીસી પોલીસ મથકમાં ફરિયાદ નોંધાવી હતી.

Facebook Comments Box

Videos

Our Partners