• SP યુનિવર્સીટીના કુલપતિ ડો. શિરિષ કુલકર્ણીને ગેરલાયક ઠરાવતો સુપ્રીમકોર્ટનો આદેશ
  • એજ્યુકેશન ફેકલ્ટીના ડીને કહ્યું, ઓડિટર જનરલે ગેરલાયક કુલપતિના પગાર-ભથ્થા વસૂલ કરવા જોઈએ
  • આ 11 યુનિવર્સિટીના કુલપતિ UGCના નિયમ મુજબની લાયકાત ધરાવતા નથી – સુપ્રીમ કોર્ટ

WatchGujarat. વિદ્યાનગર સ્થિત સરદાર પટેલ યુનિવર્સીટીના કુલપતિ ડો. શિરિષ કુલકર્ણીને ગેરલાયક ઠરાવતો આદેશ સુપ્રીમકોર્ટે આપ્યા બાદ શિક્ષણજગતમાં ખળભળાટ મચી ગયો છે. મીડિયા અહેવાલ અનુસાર, સુપ્રીમ કોર્ટે સરકારની પણ ઝાટકણી કાઢતા કહ્યું હતું કે રાજ્યની યુનિવર્સિટીઓમાં યુજીસીના નિયમ મુજબ લાયકાત ધરાવતા શિક્ષણવિદને જ કુલપતિ તરીકે પસંદ કરવા પરંતુ હજુ પણ રાજ્યની 11 યુનિવર્સીટીના કુલપતિ યુજીસીના નિયમ મુજબની લાયકાત ધરાવતા નહીં હોવાનું ખુલ્યું છે.

આ અંગે સૌરાષ્ટ્ર યુનિવર્સીટીના એજ્યુકેશન ફેકલ્ટીના ડીન ડૉ. નિદત બારોટે કહ્યું છે કે, 11 જેટલી યુનિવર્સિટીઓમાં કુલપતિ લાયકાત ધરાવતા નથી છતાં યુજીસીએ નિયત કરેલો 2 લાખ રૂપિયાથી વધુ પગાર તેઓ લઈ રહ્યા છે. યુજીસીના નિયમ પ્રમાણે 10 વર્ષ પ્રોફેસર રહ્યા હોવા જોઈએ અને પીએચડીની પદવી ધરાવતા હોવા જોઈએ પરંતુ મોટાભાગના આ પૈકીની લાયકાત ધરાવતા નથી.

યુજીસીના નિયમો મુજબની લાયકાત ન ધરાવતા કુલપતિઓના પગાર અને ભથ્થા પરત વસૂલવામાં આવે તે માટે ગુજરાત કોંગ્રેસ સમિતિના ડૉ. મનિષ દોશી અને ડૉ. નિદત બારોટે ઓડિટર જનરલને લેખિત રજૂઆત કરી માંગણી કરી છે. તેમણે કહ્યું છે કે લાયકાત ન ધરાવતી વ્યકિત આ પ્રમાણેનો ગેરબંધારણીય અને ગેરકાયદેસર પગાર લેતા હોય ત્યારે આ પગારના તેઓ હકદાર હતા નહીં.

રાજ્ય સરકારની તિજોરીને આને કારણે મોટું નુકસાન થયું છે. જ્યારે ઓડિટ વિભાગ કોઈ કર્મચારીના પગાર અંગે તપાસ કરે અને તેમાં ક્ષતિ જણાય તો વર્ષો સુધી આ પગાર પરત મેળવવા માટે પ્રક્રિયા કરે છે, ઉપરાંત કર્મચારીનું પેન્શન પણ અટકાવે છે. યુજીસી મુજબ લાયકાત ન ધરાવતા અને કુલપતિ તરીકે ખોટી રીતે લીધેલો પગાર પરત મેળવવા અને રાજ્ય સરકારની તિજોરીની નુકસાન ન થાય એ પ્રમાણે કાર્યવાહી કરવા માંગણી કરી છે.

આ 11 યુનિવર્સિટીના કુલપતિ UGCના નિયમ મુજબની લાયકાત ધરાવતા નથી

  • ડૉ. ચેતન ત્રિવેદી (ભક્ત કવિ નરસિંહ મેહતા યુનિવર્સિટી, જૂનાગઢ)
  • ડૉ. હિમાંશુ પંડ્યા (ગુજરાત યુનિવર્સિટી, અમદાવાદ)
  • ડૉ. અમી ઉપાધ્યાય (આંબેડકર ઓપન યુનિવર્સિટી, અમદાવાદ )
  • ડૉ. કિશોરસિંહ ચાવડા (વીર નર્મદ દક્ષિણ ગુજરાત યુનિવર્સિટી, સુરત)
  • ડૉ. મધુકર પડવી (બિરસા મુંડા યુનિવર્સિટી, નર્મદા)
  • ડૉ. અર્જુનસિંહ રાણા (સ્વર્ણિમ ગુજરાત સ્પોર્ટ્સ યુનિવર્સિટી, ગાંધીનગર)
  • ડૉ. હર્ષદ પટેલ (ટીચર્સ યુનિવર્સિટી (IITE), ગાંધીનગર)
  • હર્ષદ શાહ (ચિલ્ડ્રન યુનિવર્સિટી, ગાંધીનગર)
  • ડૉ. બિમલ પટેલ (રાષ્ટ્રીય રક્ષા યુનિવર્સિટી, ગાંધીનગર)
  • ડૉ. એન. એચ. કેલાવાલા (કામધેનુ યુનિવર્સિટી, ગાંધીનગર)
  • ડૉ. આર. એમ. ચૌહાણ (સરદાર કૃષિનગર દાંતીવાડા એગ્રીકલ્ચર યુનિ., પાલનપુર)
Facebook Comments Box

Videos

Our Partners