બોસ, કોરોના સંક્રમણ ઘટે કે ના ઘટે, પણ કોરોનાનો ડર – ભય – ચિંતા અને ઉચાટ દૂર કરવા માટે રૂપાણી સરકારે આજે રૂપાળું ડગ માંડ્યું છે. હવે બિચારા સામાન્ય નગરજનો રાત્રે 8 થી સવારે 6 વાગ્યા સુધી 108 સહિતની એમ્બ્યુલન્સનું સાઈરન નહીં સાંભળી શકે. એટલે કે, કોરોના કર્ફ્યુ દરમિયાન એમ્બ્યુલન્સના સાઈરન પર પ્રતિબંધ.

રૂપાણી સરકાર જે નિષ્ઠા – ખંત અને ચિવટથી કોરોનાને હરાવવા માટે કામગીરી કરી રહી છે એ ખરેખર ‘દાબિલેકાક’ છે… એટલે કે કાબિલેદાદ છે પણ શું છે સરકારની માફક દાનત સાચું જ લખવાની હતી પણ લખાઈ ગયું વિચિત્ર. સંક્રમણના બીજા તબક્કામાં કોરોનાને નાથવા માટે રૂપાણી સરકાર બનતાં બધાં જ પ્રયાસો કરી રહી છે. જોકે, નામદાર હાઈકોર્ટ સહિત અનેક બિનભક્ત પ્રજાજનોને દેખાતા નથી એ વાત જુદી છે. એમાં પાછા પક્ષમાં જ જશ ખાટવાની ટાંટીયાખેંચ ચાલે છે… હવે, બિચારી રૂપાણી સરકાર કરે તો શું કરે?

કોરોના સંક્રમણને અટકાવવાના પ્રયાસો કોઈની નજરે ચડતાં નથી એટલે રૂપાણી સરકારના અવ્વલ દર્જાના ભેજાઓએ મગજ કસી કસીને કસ કાઢ્યો કે ભલે સંક્રમણ અટકે કે ના અટકે, કોરોનાનો ડર – ભય – ચિંતા અને ઉચાટ તો અટકવો જ જોઈએ. સરકારી ભેજાવાજોએ (અહીં ભેજાબાજ નથી એ સ્પષ્ટિકરણ સાથે જણાવી દઉં કે, હાલ દમ કરતાં વધારે વાગતાં વાજાઓનું ચલણ છે એટલે ભેજાવાજો શબ્દ પ્રયોગ કર્યો છે.) હાં તો ભેજાવાજોએ ગહન ચિંતનને અંતે કોરોના કર્ફ્યુ ટાણે 108 સહિતની એમ્બ્યુલન્સના સાઈરન વગાડવાં પર પ્રતિબંધ લગાડવાનો ઐતિહાસિક નિર્ણય લીધો છે.

કોરોના પરિસ્થિતિથી ચિંતિત દેશના વડાપ્રધાન માનનિય નરેન્દ્ર મોદીએ તાજેતરમાં રાત્રિ કર્ફ્યુને કોરોના કર્ફ્યુ તરીકે ઓળખવાની મહત્વની મનની વાત કરી, એના પગલે રૂપાણી સરકારે થાળી વગાડ્યા વગર વાતનો સ્વિકાર કરી લીધો. એ ઘડી એટલી રડીયામણી હતી કે, મારી ઇચ્છા તો ગરબે ઘુમવાની થઈ ઉઠી હતી. પણ, સોશિયલ ડિસ્ટન્સનો વિચાર કરીને મન મનાવી લીધું.

હાં તો મૂળ વાત, હવે કોરોના કર્ફ્યુમાં એમ્બ્યુલન્સનાં સાઈરનનો અવાજ નહીં સાંભળવા મળે. આ જાહેરાત સાંભળીને માંડ માંડ હું હરખના આંસુ રોકી શક્યો. પણ, પછી વિચાર આવ્યો કે, રૂપાણી સરકારે રાતના સમયે કોરોના ડર – ભય – ચિંતા અને ઉચાટ દૂર કરવા આ ઐતિહાસિક ડગ માંડ્યું, તો દિવસનાં કોરોના ડર – ભય – ચિંતા અને ઉચાટનું શું?

દિવસે કોરોના સંક્રમણનો ડર – ભય – ચિંતા અને ઉચાટ દૂર કરવા માટે રૂપાણી સરકારે એમ્બ્યુલન્સના સાઈરનનો ટોન બદલી નાંખવા જેવો છે એવું મારું સૂચન છે. (સાહેબ સીવાય કોઈના સૂચનની વેલ્યૂ નથી છતાંય આતો કહી દેવું સારું) ખરેખર તો, બીજા તબક્કાનું કોરોના સંક્રમણ શરૂ થયું ત્યારે હોસ્પિટલ્સમાં બેડ્સની વ્યવસ્થા, ઓક્સિજન, આઈસીયુ આ બધી ભાંજગડમાં પડવા કરતાં સરકારના ભેજાવાજોએ એમ્બ્યુલન્સના સાઈરન બદલવાનું વિચારવા જેવું હતું.

જે એમ્બ્યુલન્સમાં કોરોના પેશન્ટ ના હોય એનું સાઈરન ‘નો કોરોના નો, નો કોરોના નો’ કરી દેવા જેવું હતું. આમેય ગો કોરોના ગો ટ્રેન્ડમાં જ હતું. વાઉં વાઉં સાંભળવાને બદલે આવી સાઈરન સાંભળીને લોકોને હૈયે કેટલી ટાઢક વળે? તે સાથે આવી સાઈરન વાળી પાંચ – સાત એમ્બ્યુલન્સ જેની પાસેથી પસાર થાય એને તો કોરોના છે જ નહીં એવી પોઝિટીવ માનસિકતા વરે. બીજા પણ અનેક ફાયદાઓ તો છે જ, પણ મુખ્યત્વે હાલ સરકારે જે કોરોના ડર – ભય – ચિંતા અને ઉચાટ દૂર કરવાનો ઉપક્રમ કર્યો છે એ લાભ તો થાય જ.

હવે તમને થશે કે, કોરોના પોઝિટીવ દર્દીને લઈ જઈ એમ્બ્યુલન્સનું સાઈરન શું રાખવું? મારું માનવું છે ફિલ્મી ગીતોના રિમિક્સ કરી દેવા જોઈએ અથવા તો કચરો લેવા આવતી ગાડીવાળા જેમ ગીત વગાડે છે એવી કોઈ ટ્યૂન બનાવડાવવી દેવી જોઇતી હતી. જેમ કે, ‘હો કોઈ રોકોના, કોરોના કો, દિલ મસલદીયા, કોરોનાને’, (આ સેમ્પલ હાર્ટ + કોરોના પેશન્ટ માટે છે, રોગ પ્રમાણે અલગ અલગ ગીત બનાવી શકાય.

બીજું ગીત કહું તો, ‘લો ચલી મૈં, અપને કોરોના પેશન્ટ કો લેકે’ અથવા તો ‘લૂંટ ગયે હમ તો કોરોના મુલાકાત મૈં’ આવા બીજા રિમિક્સ ગીતો પર વિચાર કરી શકાત. કોરોના કાળમાં નવરા પડેલાં કલાકારોને સરકારે રોજગારી આપી હોત તો હજી વધારે ગીતો બનીને આવી શક્યા હોત. પેશન્ટ કોરોના પોઝિટીવ છે કે નહીં? એની ખબર ના હોય તો એમ્બ્યુલન્સની સાઈરન ‘પતા નહીં જી કૌન સા વાઈરસ લગા હૈ’ પણ વગાડી શકાત. શું છે રિમિક્સ ગીતો હોય તો એમ્બ્યુલન્સમાં આડા પડેલાં દર્દીનું એના સ્વજનનું અને ચાલકનું મન હળવું રહે. સાથે ચિંતા – ભય – ડર – ઉચાટથી રાહત મળે.

જો કોઈને ગીત – ટ્યૂનવાળી સાઈરનનો આઇડિયા યોગ્ય ના લાગ્યો હોય તો… કોરોના પોઝિટીવ દર્દી માટેની એમ્બ્યુલન્સની એક બીજી સાઈરનનો આઇડિયા પણ છે… એમ્બ્યુલન્સની સાઈરનમાં ખાંસીનો અવાજ રાખી દેવો જોઈએ. ખાંસી ખાતી એમ્બ્યુલન્સ આવે તો વિચાર કરો… રસ્તા પરથી કોઈને હટવા માટે કહેવું પડે?

ટૂંકમાં કહું તો રૂપાણી સરકારે આજે જે ઐતિહાસિક ડગ માંડ્યું છે એના વખાણ કરવા માટે મારી પાસે શબ્દો નથી… કંઈ બોલવા જઉં તો ખાંસી ચડી જાય છે…

 

(ખાસ નોંધઃ- આ લેખ લખવા માટે લેખક કોઈ પ્રકારે જવાબદાર નથી. જે કંઈ લખાયું છે એ ભગવાને સૂઝાડ્યું છે. જેમ ‘શિવજી કી સવારી’માં મોટી સંખ્યામાં ટોળાં જામ્યાં હતાં એ માટે મંત્રી યોગેશ પટેલના કહેવા પ્રમાણે ભગવાન જવાબદાર હતાં. એવી જ રીતે આ લખવામાં ભગવાન જવાબદાર છે. માટે લેખ વાંચીને કોઈની લાગણી દુભાય તો એ માટે 33 કરોડ દેવી – દેવતાં પૈકી જે જવાબદાર હોય એમની સમક્ષ રોષ વ્યક્ત કરવો. ધન્યવાદ)

Facebook Comments

Videos

Our Partners

Allianz Cloud