• એ- ડિવિઝન પાસે જાહેરમાં ફેંકાયેલી યુઝડ પીપીઇ કીટ અને ભક્તિનગર સ્ટેશન નજીકથી 200 કરતા વધુ ઇન્જેક્શનની સિરિંજ રસ્તા પરથી મળી
  • યુઝડ પીપીઈ કીટ સહિતના આ મેડિકલ વેસ્ટ જાહેર રસ્તા પરથી મળી આવતા તંત્રની કામગીરીને લઈને અનેક સવાલો ઉઠ્યા

રાજકોટ. શહેરમાં કોરોના મહામારીને લઈ લોકો ભારે મુશ્કેલીઓનો સામનો કરી રહ્યા છે. તંત્ર દ્વારા અવનવા બહાને લોકો પાસેથી મસમોટા દંડની વસુલાત કરવામાં આવી રહી છે. પણ લોકોને શિખામણ આપતું તંત્ર પોતે સ્વચ્છતા જાળવવામાં સરેઆમ નિષ્ફળ સાબિત થઈ રહ્યું છે. આ વાતને સાબિત કરતી બે ઘટનાઓ શહેરનાં જુદા-જુદા વિસ્તારમાં સામે આવી છે. જેમાં એ- ડિવિઝન પાસે જાહેરમાં ફેંકાયેલી યુઝડ પીપીઇ કીટ મળી છે. તો શહેરના ભક્તિનગર સ્ટેશન નજીકથી 200 કરતા વધુ ઇન્જેક્શનની સિરિંજ રસ્તા પરથી મળી છે. જેને લઈને લોકોમાં તંત્ર સામે અનેક સવાલો ઉઠી રહ્યા છે.

આજરોજ શહેરનાં એ- ડિવિઝન પોલીસ મથક પાસેનો એક વિડીયો વાયરલ થયો છે. જેમાં ઉપયોગ કરીને જાહેર રસ્તા ઉપર ફેંકી દેવામાં આવેલી પીપીઇ કીટો જોવા મળી રહી છે. જો કે કોઈ હોસ્પિટલ દ્વારા આ રીતે કીટ નાખવામાં આવી કે કોઈ અન્ય દ્વારા તે હજુ જાણી શકાયું નથી. પરંતુ આ પ્રકારે ઉપયોગ કરેલી PPE કીટ જાહેરમાં ફેંકવાથી રોગચાળો વકરવાની દહેશત ઉભી થઇ છે.

બીજીતરફ શહેરનાં ભક્તિનગર સ્ટેશન નજીક મેડિકલ વેસ્ટનો જાહેરમાં નિકાલ કરાયાની ઘટના સામે આવી છે. જેમાં દર્દીને ઇન્જેક્શન મારવામાં વપરાતી સિરિંજ નો જથ્થો જાહેરમાં પડ્યો હોવાનું સામે આવ્યું છે. આ 200 કરતા વધારે સિરિંજ જાહેરમાં પડેલી જોઈને ત્યાં રહેતા લોકો દ્વારા કોર્પોરેશનને જાણ કરવામાં આવી છે. જેને લઈ આરોગ્ય વિભાગનાં અધિકારીઓ દોડી ગયા હતા. અને આ જથ્થાનો યોગ્ય નિકાલ કરી જવાબદારો સામે કડક કાર્યવાહી કરવાની ખાતરી આપી છે.

ઉલ્લેખનીય છે કે, શહેર અને જિલ્લામાં કોરોનાનું સંક્રમણ વધી રહ્યું છે. આ સંક્રમણને અટકાવવા સ્વચ્છતા રાખવી ખાસ જરૂરી બની જાય છે. તેવામાં યુઝડ પીપીઈ કીટ સહિતના આ મેડિકલ વેસ્ટ જાહેર રસ્તા પરથી મળી આવતા તંત્રની કામગીરીને લઈને અનેક સવાલો ઉઠી રહ્યા છે. ત્યારે હવે આ અંગે ક્યારે અને શું કાર્યવાહી કરવામાં આવે છે તે તો આવનારો સમય જ બતાવશે.

Facebook Comments

Videos

Our Partners

Allianz Cloud