• જીવનની અડધી સદી વટાવી ચુકેલા ડો. રાજેશ શાહે તાજેતરમાં 8 મો ડિગ્રી કોર્ષ જોઇન કર્યો
  • સાવલીમાં રહી સ્કુલનું ભણતર પુરૂ કરી ચુકેલા ડો. રાજેશ શાહ (નિકીર) વધુ અભ્યાસ અર્થે વડોદરા આવ્યા હતા
  • પ્રિન્સીપાલે વિદ્યાર્થીનો જવાબ સાંભળીને એડમીશન આપ્યું અનેે જીવન બદલાયું
  • ડો. રાજેશ શાહ કોર્પોરેટર તરીકેની બીજી ટર્મ જીત્યા છે. અને આરોગ્ય સમિતીના ચેરમેન તરીકેનો કાર્યભાર સંભાળે છે
  • હોમિયોપેથીના પ્રસાર પ્રસાર માટે ફાર્માસી અને રાજ્યનું પ્રથમ પેપર શરૂ કર્યું
  • વડોદરામાંથી તબલામાં ગુજરાત પ્રથમ આવી ત્રણ ગોલ્ડ મેડલ મેળવનાર એકમાત્ર વિદ્યાર્થી ડો. રાજેશ શાહ (નિકીર)

પાર્થ બી. પંડ્યા. એક જાણીતી ઉક્તિ પ્રમાણે જ્યારે વિદ્યાર્થી ભણવા માટે તૈયાર હોય ત્યારે શિક્ષક તેને મળી જાય છે. તેવું જ કંઇક આજથી 35 વર્ષ પહેલા વડોદરા નજીક આવેલા સાવલી ગામના યુવાન સાથે થયું હતું. સાવલીથી વધુ અભ્યાસ અર્થે વડોદરા આવેલા રેડીયો રીપેરીંગ કરનારના પુત્રને પ્રિન્સીપાલે શાળામાં જગ્યા નહિ હોવાનું જણાવ્યું તો તેણે જવાબ આપ્યો કે, હું નીચે બેસીને ભણી લઇશ. ગામડાના એક વિદ્યાર્થીના વિચારોથી પ્રભાવિત થઇને પ્રિન્સીપાલે તેને તુરંત જ ફી ભરાવીને એડમિશન આપી દીધું. ત્યાંથી શરૂ થયેલો ભણવાનો સફર આજદિન સુધી ચાલું છે. આજે તબિબ, એમડી, એમબીએ સહિત 7 વિવિધ પ્રોફેશલ્સ ડિગ્રી ધરાવતો વિદ્યાર્થીનું જીવન ભણતર માટે પ્રેરણા રૂપ છે. જીવનની અદધી સદી વટાવી ચુકેલા ડો. રાજેશ શાહે 8 મો ડિગ્રી કોર્ષ જોઇન કર્યો છે.

ભણવા માટે સાવલીથી વડોદરા આવ્યા અને જીવન સંપુર્ણ પણે બદલાવવાનું શરૂ થયું

તબિબિ, એમ.ડી સાથે અલગ અલગ 7 ડિગ્રી ધરાવતા અને હાલ 8 માં કોર્ષમાં એડમિશન લઇને ભણવાનું શરૂ કરનાર ડો. રાજેશ શાહ (નિકીર) વડોદરાના કાઉન્સિલર છે. તેમણે watchgujarat.com સાથે વાત કરતા જણાવ્યું કે, હું અને મારો પરિવાર સાવલીમાં રહેતા હતા. પિતાજી પ્રથમ સાયકલ અને પછી રેડીઓ સેલ્સ અને રીપેરીંગનું કામ અને માતા ગૃહિણી હતા. પિતાજીનું કામ જનતા રેડીયોના નામે જાણીતું હતું. ધો. 8 સુધીનું મારૂ ભણતર સાવલીમાં જ થયું હતું. ત્યાર બાદ વધુ ભણવા માટે હું વડોદરા આવ્યો હતો. ત્યારે આપણી સાથે કોઇ આવે તેવું ન બને. જાતે જ બધું કરવું પડે. હું ફતેગંજ વિસ્તારમાં આવેલી જાણીતી શાળાના પ્રિન્સીપાલ પાસે પહોંચ્યો અને એડમિશન માટે પુછ્યું. પ્રિન્સીપાલે કહ્યું કે, અમારા ક્લાસમાં જગ્યા નથી. ત્યારે મેં નિખાલસ ભાવે જવાબ આપ્યો કે, હું નીચે બેસીને ભણી લઇશ. જવાબ આપ્યા બાદ પ્રિન્સીપાલ મારી સામે જ જોતા રહ્યા અને કહ્યું કે, કાલે આવીને ફી ભરી જજે. આ પ્રસંગ બાદ મારા જીવનમાં મહત્વનો વળાંક આવ્યો હતો.

 

ડો. રાજેશ શાહના પિતા સાવલીમાં જનતા રેડીયોના નામથી રીપેરીંગ શોપ ચલાવતા હતા

હું અને મારા ભાઇઓમાં સંસ્કારનો સંચય કરવામાં અમારી માતાનો સિંહ ફાળો – ડો. રાજેશ શાહે

ડો. રાજેશ શાહે જણાવ્યું કે, ત્યાર બાદ ધો – 11  અને 12 માં અંગ્રેજી મીડિયમમાં પ્રથમ વખત ભણવાનું આવ્યું. પ્રિન્સીપાલે મદદ કરવાની હિંમત આપી એટલે મહેનત કરીને તે પણ ક્લિયર થઇ ગયું. ત્યાર બાદ વડોદરા જિલ્લાની પ્રથમ સાવલી હોમીયોપેથીક મેડીકલ કોલેજમાંથી તબિબિનો અભ્યાસ કર્યો. દરમિયાન મારી કોલેજમાં હું જનરલ સેક્રેટરી હતો. ત્યારથી લઇને આજદિન સુધી ભણવાનું ચાલુ જ છે. હું અને મારા ભાઇઓમાં સંસ્કારનો સંચય કરવામાં અમારી માતાનો સિંહ ફાળો હતો.

મેડીકલ પ્રેક્ટીસમાં 70 ટકા લોકો પૈસા લખી દેજો એવું કહેતા

ડો. રાજેશ શાહે ઉમેર્યું કે, ડોક્ટર બન્યા બાદ નિઝામપુરા વિસ્તારમાં પ્રેક્ટીસ કરવાનું ચાલુ રહ્યું હતું. ત્યારે રૂ. 1 ફી તરીકે હું લેતો હતો. શરૂઆતના સંઘર્ષના દિવસો એવા હતા કે, 70 ટકા જેટલા દર્દીઓ દવા લીધા બાત એટલું જ કહેતા કે લખી દેજો. આ શબ્દ જીવનમાં એટલી વખત સાંભળ્યો છે કે જો હવે કોઇ જગ્યાએ લખી દેજો શબ્દ વાંચવામાં આવે તો તુરંત જ જુની યાદોમાં સરી પડાય છે. અગાઉ રાત સુધી મેડીકલ પ્રેક્ટીસ કર્યા બાદ મોડી રાત્રે લોકોના ઘરે ઘરે જઇને વિઝીટ માટે જવાનું થતું હતું. અત્યાર સુધીની તબિબ તરીકેની કારકીર્દીમાં મને 17 લાખથી વધુ લોકોની સારવાર કરી હશે. ત્યાર બાદ મેં મારૂ એમ બી એ શરૂ કર્યું હતું.

તબલામાં વિશારદ કરી પ્રથમ વખત વડોદરાના વિદ્યાર્થી તરીકે રાજ્યમાં પ્રથમ ક્રમ મેળવ્યો

હોમીયોપેથીમાં એમ.ડી થયા બાદ એમબીએ અને સંગીત ભણવાનું શરૂ કર્યું. વર્ષ 2003 – 2004 માં તબલામાં વિશારદ કર્યું. વડોદરાના વિદ્યાર્થીએ રાજ્યમાં પ્રથમ વખત કોઇએ પહેલો ક્રમાંક મેળવ્યો હતો. મને તબલામાં ત્રણ ગોલ્ડ મેડલ મળ્યા. હવે સંગીતની સાથે સાથે લખવાનું પણ શરૂ કર્યું. પરંતુ મન હોય અને સમય ન મળે તેવું પણ થાય. તેવા કિસ્સામાં મેં રસ્તો કાઢી લીધો. અમારે ત્યાં કન્સલ્ટેશન માટે આવતા બે દર્દીઓ વચ્ચેના સમયમાં હું મારી પાસે રાખેલી નોટબુકમાં કાવ્ય લખવાનું પસંદ કર્યું. આમ કરતા કરતા 6 મહિનામાં બે બુક લખી નાંખી અને ત્યાર બાદ તેને પબ્લીશ પણ કરી હતી.

હોમીયોપેથીના પ્રસાર માટે મેન્યુફેક્ચરીંગ શરૂ કર્યું

ડો. રાજેશે જણાવ્યું કે, હોમીયોપેથીકની પ્રેક્ટીસ કરતા વિચાર આવ્યો કે, જો વધુ લોકો સુધી હોમીયોપેથીનો પ્રસાર કરવો હશે તો મેન્યુફેક્ચરીંગમાં જવું પડશે. ત્યાર બાદ મારી ફિલ્ડથી થોડાક અલગ ફાર્માસીના ક્ષેત્રમાં મેં ઝંપલાવ્યું હતું. અને હાલ મેં નક્કી કરેલા લક્ષ્ય પ્રમાણે હોમીયોપેથીના પ્રસારનું કામ ચાલી રહ્યું છે. અને તેનો બહોળો લોકપ્રતિસાદ પણ સાંપડી રહ્યો છે. તેની સાથે હોમીયોપેથીના લિટ્રેચરને વધુ લોકો સુધી લઇ જવા માટે રાજ્યનું પહેલું હોમિયોપેથીક માસીક પેપર પણ શરૂ કર્યું હતું.

લિમ્કાબુક ઓફ વર્લ્ડ રેકોર્ડમાં બે અને ઇન્ડિયા બુક ઓફ રેકોર્ડમાં એક રેકોર્ડ નોંધાયા

ડો. રાજેશ શાહે કહ્યું કે, રાજકારણમાં મારો પ્રવેશ તો કોલેજ કાળમાંથી જ થઇ ચુક્યો હતો. પરંતુ સક્રિય રાજકારણમાં હું વર્ષ 2010 માં આવ્યો હતો. અને ત્યાર બાદ વર્ષ 2015 માં મને કોર્પોરેટર તરીકે ભાજપામાંથી ટીકીટ મળી હતી. અને હું ચુંટાયો હતો. હાલ કોર્પોરેટર તરીકેની બીજી ટર્મ ચાલું છે. મારા નામે 2 રેકોર્ડ લિમ્કાબુક ઓફ વર્લ્ડ રેકોર્ડમાં અને એક ઇન્ડિયા બુક ઓફ વર્લ્ડ રેકોર્ડમાં ઉમેરાયા છે.

આગળ પણ લોકસેવા સાથે ભણતા જ રહેવાની ઇચ્છા

ડો. રાજેશ શાહે આખરમાં ઉમેર્યું કે, મેં અત્યાર સુધી અલગ અલગ 7 પ્રોફેશનલ ડિગ્રી મેળવી છે. તેમ છતાં નવું શીખવા તરફ મન મને લઇ જતું હતું. જેને કારણે તાજેતરમાં જ MA (પોલીટીકલ સાયન્સ) વિષયમાં એડમિશન લીધું છે. અને આગળ પણ લોકસેવા સાથે ભણતા જ રહેવાની ઇચ્છા છે.

હાલ ડો. રાજેશ શાહ વડોદરા મહાનગર પાલિકાની આરોગ્ય સમિતીના ચેરમેન છે. કોર્પોરેટર તરીકે ચુંટાયા બાદ સતત બીજી ટર્મ આરોગ્ય સમિતીના ચેરમેન તરીકેની જવાબદારી નિભાવી રહ્યા છે.

Facebook Comments

Videos

Our Partners

Allianz Cloud